देशभर शिक्षक अभाव टार्न थप ६० हजार शिक्षक दरबन्दी आवश्यक पर्ने देखिएको शिक्षा तथा मानव स्रोत विकास केन्द्रले जनाएको छ ।
देशभर २७ हजार ८१३ सामुदायिक विद्यालय छन् जसमा हाल स्थायी, अस्थायी र राहत गरेर जम्मा १ लाख ५६ हजार शिक्षक कार्यरत छन् । यसमा स्थायी शिक्षक दरबन्दीको संख्या १ लाख २ हजार ३६४ छ ।
निमावि र मावि तहमा करिब २५–२५ हजार तथा कक्षा ११ र १२ का लागि करिब ८ हजार शिक्षकको दरबन्दी थप्न आवश्यक रहेको केन्द्रले जनाएको छ ।
शिक्षा, विज्ञान तथा प्रविधि मन्त्रालयले गठन गरेको शिक्षक दरबन्दी पुनर्वितरण कार्यदलले पनि २०७५ सालमा माध्यमिक तह (कक्षा १०) कक्षासम्म करिब ५० हजार नयाँ शिक्षक दरबन्दी आवश्यक रहेको ठहर गरेको थियो ।
शिक्षक सेवा आयोगले स्थायी दरबन्दीमा शिक्षक भर्नाको विज्ञापन खुलाउने तयारी गरेको छ । पदाधिकारी पाएसँगै आयोगले नियमित काम गर्न थालेको हो ।
आयोगका अध्यक्ष मधु रेग्मीले क्यालेन्डर बनाएर नियमित काम अघि बढाउने बताए । उनका अनुसार आयोग करिब एक वर्ष पदाधिकारीविहीन भएकाले केही नियमित कामहरू रोकिएका छन् ।
नियमित रुपमा चाँडै गर्नुपर्ने कामलाई प्राथमिकतामा राखेर अघि बढ्ने योजनाअनुसार शिक्षक दरबन्दी खुलाउन लागिएको उनले बताए । केही दिनमै स्थायी शिक्षक दरबन्दीमा विज्ञापन आह्वान गर्ने तयारी छ ।
आयोगका सूचना अधिकारी सुदर्शन मरहठ्ठाले करिब १२ हजार स्थायी दरबन्दीमा विज्ञापन आह्वान गर्न लागेको बताए । उनका अनुसार आधारभूत तहका १० वटा विषयमा र माध्यमिक तहका १३ वटा विषयमा दरबन्दी आह्वान गर्न लागिएको छ ।
प्राथमिक तहमा ९ हजार १०६ जना, निमाविमा १ हजार ९१३ जना र माविमा १ हजार ४२ जना गरेर जम्मा १२ हजार ६१ जना शिक्षकको रिक्त दरबन्दीमा विज्ञापन आह्वान गर्ने तयारी भइरहेको मरहठ्ठाले बताए ।
